ព្រះវិហារ៖ រមណីយដ្ឋានប្រាសាទកោះកេរ ទទួលបានភ្ញៀវទេសចរជាង ១ម៉ឺននាក់ ខណៈរមណីយដ្ឋានប្រាសាទព្រះវិហារ បានទទួលភ្ញៀវទេសចរជាង២ពាន់នាក់ ក្នុងឱកាសបុណ្យភ្ជុំបិណ្ឌ។

យោងតាមសេចក្តីប្រកាសព័ត៌មានស្តីពី ស្ថិតិភ្ញៀវទេសចរចូលទស្សនារមណីយដ្ឋានប្រាសាទព្រះវិហារ និងរមណីយដ្ឋានប្រាសាទកោះកេរ របស់អាជ្ញាធរជាតិព្រះវិហារចេញនាថ្ងៃអង្គារ៍ ទី១៧ ខែតុលា ឆ្នាំ២០២៣ ឱ្យដឹងថា ក្នុងឱកាសបុណ្យភ្ជុំបិណ្ឌ រយៈពេល៣ថ្ងៃ ចាប់ពីថ្ងៃទី១៣ ដល់ថ្ងៃទី១៥ ខែតុលា ឆ្នាំ២០២៣ រមណីយដ្ឋានប្រាសាទព្រះវិហារ បានទទួលភ្ញៀវទេសចរ សរុបចំនួន ២ ៦២៦នាក់ ថយចុះ ៣ភាគរយ ធៀបនឹង ឆ្នាំ២០២២ ក្នុងនោះមានភ្ញៀវទេសចរជាតិ ចំនួន ២៥៣៣នាក់ (ថយចុះ ៥ភាគរយ) និងភ្ញៀវទេសចរបរទេស ចំនួន ៩៣នាក់ (កើនឡើង ៤៥ភាគរយ)។

ដោយឡែក រមណីយដ្ឋានប្រាសាទកោះកេរ បានទទួលភ្ញៀវទេសចរជាតិ សរុបចំនួន ១០ ៨៧៨នាក់ កើនឡើង ៦៨២ភាគរយ ធៀបនឹងឆ្នាំ២០២២។

គួរឱ្យដឹងដែរថា រយ:ពេល៣ថ្ងៃនៃពិធីបុណ្យភ្ជុំបិណ្ឌ ខេត្តព្រះវិហារទទួលបានភ្ញៀវទេសចរសរុបចំនួន ២០ ៣៤៩នាក់ កើនឡើងចំនួនជាង ៥០ភាគរយ បើធៀបនឹងរយ:ពេលដូចគ្នានៅឆ្នាំ២០២២។

ខេត្តព្រះវិហារ មានប្រាសាទបុរាណជាច្រើនកន្លែង ខណៈមានប្រាសាទ៣ សំខាន់ គឺប្រាសាទព្រះវិហារ ស្ថិតនៅលើកំពូលភ្នំដងរែក ជាប់ព្រំដែនប្រទេសថៃ ប្រាសាទកោះកែរ និងប្រាសាទព្រះខ័នកំពង់ស្វាយ ដែលប្រាសាទទាំង៣មានសក្តានុពលខ្ពស់ ក្នុងការទាក់ទាញភ្ញៀវទេសចរណ៍៕